新益美食分店抗通脹益街坊

綿羊

新益美食分店抗通脹益街坊 小 輝

煎豬扒包塊豬扒夠大塊，包食得滿足。 帶子撈麵，有三粒大大粒帶子，加上麵上蝦子，鮮上加鮮。 食包包，食飽飽，早餐或下午茶食一個超大的菜肉大包。 千奇米酒雞湯麵，米酒味濃，帶出雞的鮮味。 翅湯碗仔翅，用眞翅湯熬製，有機會食到魚翅，雞絲和粗粗的粉絲，味道夠鮮。 鮑魚撈麵，有一粒鮑魚仔，用料不馬虎。還有魚翅撈麵，將魚翅、蝦子和麵撈匀，啖啖魚翅和蝦子。

新益美食分店抗通脹益街坊     新益美食老闆肥仔俠的生招牌做到街知巷聞，望廈社屋望善樓旁窄巷的新益美食（分店）開業一年多，分店麻雀雖小，五臟俱全。各式粉麵湯撈、粥品、腸粉、多種飮品和包點、多士，吹雞即做的三十多種碟頭飯（廿五至三十文），以及抗通脹，為人民服務的十八文三肉一菜，同樣有約二十種選擇，加兩文就有例湯、盒裝飮料或蒸餾水，任選其一，外賣和堂食同價，回饋社會益街坊。肥仔俠話肉碎蒸滑蛋、黑椒豬扒、豉汁蒸鳳爪、豉汁蒸排骨等都好受歡迎。     肥仔俠又點會無特別食品推介呢，他將本店的千奇米酒雞菜式帶到分店，轉變為千奇米酒雞湯麵，賣廿八文，算是合理。最重要是酒香撲鼻，味濃好味，同樣不少捧場客。用眞翅湯的翅湯碗仔翅，好彩的話會食到魚翅，只需十文。大大塊豬扒的煎豬扒包和菜肉大包，同樣美味。“食碗富貴麵，全年包你掂”，肥仔俠又帶來特色美食，就係鮑魚撈麵、魚翅撈麵和帶子撈麵，每款都加有蝦子，令到碗麵更加鮮味，每款都係五十八文。肥仔俠話豐儉由人，任君選擇。