一柚多食唔使嘥

綿羊

一柚多食唔使嘥 周 中

一柚多食唔使嘥 早排受香港地球之友邀請，為佢哋嘅《食得唔好嘥》拍攝環保食譜，主角係沙田柚。平時我哋食柚子，習慣齋食果肉，其他部分就一抌了之，實在浪費。其實柚子全身都係寳，柚子外皮刨乾淨汆水，可以用來做天然嘅清潔劑；中間嘅白色柚皮、柚子肉，甚至嗰層薄薄嘅柚衣都可以用來煮餸，味道一啲都唔輸蝕其他食材。 嗰日我哋就用一粒沙田柚整咗三個菜：一個係柚皮炆雞翼，將雞翼洗乾淨做個切口，用豉油同醬料醃製半個鐘；跟住將柚皮刮去皮青分成幾片，用清水浸一陣，撈起榨乾水分；用白鑊乾煎柚皮，加入油、鹽、酒，慢火煮十分鐘，最後兩種材料一齊中火炆熟，咁就搞掂。柚子皮嘅清香滲入雞肉，食落又爽又滑，非常香口。第二樣餸係柚衣蒸腩肉，用柚衣代替其他食材，會有陣淡淡嘅香味同苦味，仲可以解油膩。第三樣餸就係柚子大蝦沙律，食完前兩個餸再跟個柚子沙律，口味清爽又健康。咁嘅環保食譜可以將一個柚子全部用晒，渣都冇剩，而且食得豐富又開心！ 雖然經濟水平比起舊時上升唔少，但節約始終係美德，由煮飯入手都有得慳，梗係要多多提倡喇。聽講宜家仲好流行用柚子整成柚皮糖，旣可以嘗試DIY嘅樂趣，又可以當作健康零食，等我得閒都搵機會試吓！