 【太陽報專訊】黎瑞恩與金利來三少曾智明結婚11年，昨日驚傳「分」訊，有傳曾智明結識女密友，令小恩子心灰意冷，更驚動老爺曾憲梓！
現年40歲的黎瑞恩（小恩子）2002年與曾智明結婚，嫁入豪門做少奶奶的小恩子即淡出娛樂圈，為丈夫先後誕下一女一子，專心做湊仔婆，直至去年11月底才為慈善舉行兩場演唱會，一解「歌癮」。人前幸福滿瀉的小恩子昨日爆出婚姻亮紅燈達兩年之久的消息，有傳近年長駐內地工作的曾智明結交了一名女性密友，甚少回家，自此二人感情破裂。每逢老公公幹返港，她都會搬離大宅，直到老公離港。她曾向好友訴苦，幸半年前認識可訴心事的好好朋友，而前全國人大常委老爺曾憲梓亦插手，希望事件低調處理，期間更有人提出離婚，但據知兩公婆仍未簽字。身在外地的小恩子昨日以WhatsApp回應婚變傳聞時只簡單地說：「多謝關心，我冇嘢回應。」而曾智明亦口徑一致地表示不回應：「家家有本難唸的經，家事唔想多講啦！（係咪有密友？）我唔係娛樂圈嘅人，我唔需要、亦唔準備講私人生活。」
孫敬安聞「分」訊擔心
而兩個月前為小恩子舉辦演唱會的馬天尼娛樂老闆孫敬安對好友婚變傳聞表示不知情：「演唱會嗰陣唔覺佢有異樣，聽到呢個消息都擔心，會打去了解吓！」他又指曾智明在老婆開騷期間自掏腰包買200張門票捐到慈善機構以示支持。而與小恩子同為「寶麗金小花」之一的湯寶如亦指不知情：「完全唔知呢件事。（會唔會擔心？）我深信佢咁大個人識處理。」而小恩子最好的姊妹羅敏莊亦支持她：「作為好朋友會企喺佢嗰邊支持佢，最緊要佢開開心心！（係咪婚變？）呢啲留番佢講。」另外，小恩子爆出婚變後，大批傳媒昨日到其九龍塘大宅外守候，但未見其影蹤，只有傭人坐着七人車出入。 | 
